တတိယအကြိမ်မီးလောင်ခြင်း
၂၀၁၁ခုနှစ်အတွင်း မြို့တော်ပုသိမ်တွင် တတိယအကြိမ်မြောက် မီးလောင်မှု တစ်ခု ယနေ့ နေ့လည် (၂)နာရီ မိနစ်(၅၀)ခန့်က ဖြစ်ပွါးခဲ့ပါတယ်။ အမှတ်(၂)ရပ်ကွက် ကမ်းနားလမ်း ငွေဆောင်ဇက်ဆိပ်ဟောင်းရှိ ရွှေမြင့်မိုရ်သံပစ္စည်းစတီးနှင့် ဂက်စ်အိုးရောင်းဝယ်ရေး ဆိုင်တွင် ဂက်စ်အိုး လဲလှယ်ရာမှ စတင်မီးလောင်မှုဖြစ်ပွါးခဲ့ခြင်းဖြစ်ပြီး မြို့နယ်မီးသတ်မှ မီးသတ်ကား(၇)စီး မြို့နယ်စည်ပင် ရေကား(၁)စီးတို့ဖြင့် ၀ိုင်းဝန်းငြိမ်းသတ်မှုကြောင့် ညနေ(၃)နာရီ ခွဲလောက်မှာ မီးငြိမ်းသတ်နိုင်ခဲ့ပါတယ်။ ဆိုင်ခန်း(၃)ခန်း မီးလောင်ကျွမ်းခဲ့ပြီး လူ(၃)ဦး ထိခိုက်ဒဏ်ရာရရှိခဲ့ပါတယ်။ မီးလောင်မှုကြောင့် အိုးမဲ့အိမ်မဲ့ဖြစ်ပွါးသူ မရှိဘဲ ဆုံးရှုံးမှု တန်ဖိုး (၁၂)သိန်းခန့်ဖြစ်ကြောင်း မြို့နယ်မီးသတ်ဌာနက ခန့်မှန်းတွက်ချက်ထားပါတယ်။ မီးလောင်ရာသို့ တိုင်းဒေသကြီးအစိုးရအဖွဲ့ အကြီးအကဲနှင့် တာဝန်ရှိသူများ လာရောက် ကြည့်ရှုသွားခဲ့ကြောင်း သိရှိရပါတယ်။ မီးလောင်မှုဖြစ်ပွါးတဲ့ ဆိုင်ခန်းအနီးမှာ တရားမ၀င် စက်သုံးဆီ အရောင်းဆိုင် ရှိနေပြီး ယင်းဆိုင်မှ ဆီတိုင်ကီများနဲ့ မီးလောင်မှုဖြစ်တဲ့ ဆိုင်မှ ဂက်စ်အိုးများကို မီးလွတ်ရာသို့ အချိန်မီ ရွှေ့ပြောင်းနိုင်မှုကြောင့်သာ မီးလောင်မှုကို ထိန်းချုပ်နိုင်ခဲ့ခြင်း ဖြစ်ကြောင်းနှင့် ယင်းဆီတိုင်ကီများ မီးလောင်ပေါက်ကွဲပါက မြို့တော်ပုသိမ်အတွက် စိုးရိမ်ရတဲ့ မီးလောင်မှုကြီး ဖြစ်ပွါးသွားနိုင်တဲ့အတွက် မြို့တော်သူ/သားများက အထူးစိုးရိမ် ထိတ်လန့်ခဲ့ကြရကြောင်း သိရှိရပါတယ်။ မြို့တော်ပုသိမ်မှာ ကမ်းနားလမ်းတစ်လျောက် မြောက်မြားစွာသော တရားမ၀င် ဆီဆိုင်များ သိုလှောင်ခြင်း ရောင်းချခြင်းများ ပြုလုပ်နေကြတဲ့ အတွက် ယခုလို ပေါ့ဆမှုကြောင့် မီးလောင်မှုမျိုး ထပ်မံဖြစ်ပွါးမှာကို မလိုလားတဲ့ မြို့တော်သူ/သားများက နွေရာသီဖြစ်၍ ဆီဆိုင်များကို မြို့တွင်း၌ မထားစေလိုကြကြောင်း သိရှိရပါတယ်။
No comments:
Post a Comment